من شهر ونص جالي شاب كان إتواصل معايا من خلال إعلان لشغل محتاج فيه عمال باليومية ،الشاب جالي ..ما شاء الله الهيبه باين عليه ،شكله بن ناس وبن عز ،إستغربت إن واحد بالشكل والهيئة دي جاي يشتغل باليومية ينضف شقق تحت الانشاء ،الناس اللي معايا كلهم مستغربين ،أخويا الكبير قالي ف حاجه غلط دى مش هيئه واحد يشتغل الشغل ده أكيد وراه قصه إيه هيا الله أعلم !! تاني يوم نزلنا الشغل وزعت العمال ع مكان شغلهم وصعبان عليا مش عارف أعمل معاه إيه ،ف خدته ف عماره لوحده وقولتله معاك دور كذا وكذا ،اى راتش شيله واحدفه تحت وما شاء الله عليه طلع بتاع شغل وعنده ضمير وسريع.. ف جينا آخر النهار ،انا حبيته ف الله ،شاب شكله جميل وطول بعرض ما شاء الله وملامحه بريئه ،نزلت أنا وهو واخويا والحوار دار كالأتي إنت منين ،قالي من كذا معاك إيه،تجاره عربي وكنت شغال محاسب ف شركه كذا. شكلك مش بتاع بهدله ولا مرمطه ،محدش بيختار اقداره ولا نصيبه الحمد لله . اي اللي اضطرك للشغل ده ،قالي الظروف والشغل مش عيب المهم الواحد يلاقي ف ايده قرش لأن الحوجه مره. احمد دخل قلوبنا باحترامه وجماله وقررنا نخليه مشرف ع العمال عشان لا يتبهدل ولا يتمرمط. فات اسبوع ،خفه دم ورجوله وشخصيه قياديه خلت كل العمال والمهتدسين اللي اتعاملوا معاه ف الموقع يحبوه ويقولولنا كنتوا مخبين الناس الحلوه دي فين. عرفنا منه لما اطمن لينا انه ملوش حد غير اخ مسافر بره من ١٥ سنه وميعرفش عنه حاجه ووالده ووالدته متوفيين من ٦ سنين وبسبب فشل مشروعه اداين وبقا عليه نص مليون جنيه وصدر عليه أحكام وبقاله سنتين ع الحال ده لا عارف يتوظف عشان الفيش صعب يعمله واي شغل بيجيله بيشتغله عشان يقدر يصرف ع نفسه. احمد ٢٩ سنه ،مبيفوتش فرض ،اي شاب معانا بيشرب سجاير يفضل ينصح فيه يبطلها. طب معاك حاجه من المبلغ ،قالنا لا انا يوميتي مبتتخطاش ١٥٠ جنيه ولو وفرت قرش بتيجي فتره مبيكونش فيها شغل والفلوس بتصرف او لو تعبت شويه ،طب قصدت حد ،حاولت اوصل لاخويا لكن بدون جدوى وبيتنا ايجار قديم مفيش حاجه أبيعها وخوفي أقابل ربنا وأنا عليا الديون دي ومرتحش ف تربتي وبتعز عليا نفسي إني أروح لجمعيات او ناس بتساعد يساعدوني وتارك الأمر لله لو ليا نصيب أسد ديوني هيسخرلي السماء والارض وما عليهم لقضاء حاجتي. إيمانه وعزة نفسه عرفوني معدنه وأصله الطيب واللي أكدلي ان كنت باجي احاسبه ف اديلو مبلغ زياده يقولي لا مش هاخد غير حسابي ويرفض ياخد الزياده. من أسبوعين طلب مني ٥٠٠ جنيه وقالي اخصمهم م الحساب وراح جاب كيلو كبده وفينو وعملهم وغلفهم ف اكياس ونزل وزعهم ،ف بقوله بتعمل كده علطول قالي بتمني بس الظروف مبتساعدش طول الوقت بس حسيت اني محتاج اعمل كده ،حاجه بسيطه بس لو ربنا تقبلها بنيتي فيها هيخلف عليا بيها كتير . والله تاني يوم روحنا كومباوند وخدته معايا هو بس وباقي العمال ف موقع الشغل (عشان يستفيد هو وأقدر اساعده )،العميد صاحب الفيلا شافه وهو شغال قالي مين ده شكله بن ناس وكل شويه بينفض هدومه بس شكله بتاع شغل ،والله ما كان ف نيتي حاجه واتكلمت بعفوية قولتله ده قصته قصه ،وحكيت له كل حاجه ،ف قالي أيوا كده الموضوع صح ،خليه يجيب بطاقته ،ندهت ع احمد وهو بيديه بطاقته كان ف نظرات قلق منه حاولت اطمنه وطلبت منه يكمل شغله ،نص ساعه كان كل الأحكام اللي عليه والأماكن اللي شاكياه منهم افراد خارجيين كانوا مبعوتين ف رساله ع الواتس للعميد ده وانا والله ما كنت أعرف هو شغال إيه ،بعد يومين كان هو عمل تحريات عنه ،كلمني وطلب مني اروح له انا وأحمد. مكنتش عارف عاوزنا ليه وكنت قلقان عليه جدا وبقول لو حصله حاجه هبقي أنا السبب ،المفاجاه ان العميد جابله تاريخ حياته.احمد كان قاعد مخضوض وبيسمع له وبيردد ع لسانه وأفوض أمرى إلي الله وكأنه متوقع إنه هيتقبض عليه مع ان العميد كلامه مكنش فيه اي حاجه تقلق ولا حاجه غلط ف حق احمد بس الخوف سيطر عليه . الحمد لله الفلوس اللي على احمد اللي كانت للأفراد اتدفعت والناس اتنازلت لسا البنك بعد اجازه العيد وكل ده بكفالة من العميد جزاه الله كل خير. إمبارح كنت قاعد معاه وبقوله ربنا بيسبب الأسباب بس انت عملت اي يخليه يسخرلك الحكومه اللي أنت خايف منها هيا اللي تساعدك ويخلي هيئتك سبب ف استغراب الناس عشان تعرف قصتك ،قالي يقين بالله وتفويض الأمر لله ،انا اليوم اللي عملت فيه اطعام حلمت ان حد بيديني تفاحه وجه واحد قالي زى ما اداك إدي غيره ،مكنتش فاهم الحلم بس نويت اعمل الاطعام وربنا تقبل النيه و٥٠٠ جنيه كانوا سبب ف سداد ٥٠٠ الف جنيه. كبتب ليكم البوست وقصه أحمد عشان اقولكم متستعجلوش لو لسا ملقتوش ثمار اطعامكم وصداقاتكم ربنا بيسبب الأسباب ف اوانها وعشان اقولكم عالجوا ضيق الرزق والهموم والمرض واي حاجه بالصدقات حتي لو بمبلغ بسيط رُب درهم سبق الف دينار منقوله
